دیپلۆماته‌کانی رۆژئاوا دژی ئێران ده‌ست به‌کار بوون

حوزه‌یران 23, 2009 at 21:32

_79429_nadaڕێنێسانس نیوز؛ له‌ یانزه‌یه‌مین رۆژی سه‌رهه‌ڵدانه‌ جه‌ماوه‌رییه‌کانی خه‌ڵکی ئێراندا، دیپلۆماتکارانی رۆژئاوا هه‌نگاوی کۆنکرێت به‌ دژی کۆماری ئیسلامیی ئێران هه‌ڵدێننه‌وه‌ ڕێکخراوه‌کانی پارێزه‌ری مافی مرۆڤیش ئیدانه‌ی توندوتیژییه‌کانی ده‌وڵه‌ت ده‌که‌ن به‌ دژی خۆپیشانده‌ران.

له‌و ئاقاره‌دا وه‌زاره‌تی ده‌ره‌وه‌ی سوێد ئه‌مڕۆ باڵوێزی ستۆکهۆڵمی کۆماری ئیسلامیی ئێرانی په‌لکێش و نیگه‌رانییه‌کانی وڵاته‌که‌ی له‌مه‌ڕ بارودۆخی ئێران پێ ڕاگه‌یاند. هاوکات چه‌ندین وڵاتی دیکه‌ی وه‌ک ئه‌ڵمانیا، فه‌ڕانسه‌ و ئیتالیاش به‌ هه‌مان مه‌به‌ست باڵوێزه‌کانی ئێرانیان بانگ کردووه‌.

“فرانک به‌لفراگێ”، سکرتێری وه‌زریری ده‌ره‌وه‌ی سوێد ئه‌مڕۆ باڵوێزی ستۆکهۆڵمی کۆماری ئیسلامیی ئێران، حه‌سه‌ن قه‌شقاویی بانگی وه‌زاره‌ته‌که‌ی کرد و وه‌ک ڕادیۆی سوێد بڵاویکرده‌وه‌ ” نیگه‌رانیی خۆی سه‌باره‌ت به‌ بارودۆخی هه‌نوکه‌یی ئێران پێڕاگه‌یاند”.

به‌لفراگێ له‌گه‌ڵ ئه‌وه‌یدا که‌ بانگه‌شه‌کانی ئێرانی سه‌باره‌ت به‌ ده‌ستوه‌ردانی یه‌کیه‌تیی ئه‌ورووپا له‌ کاروباری ناوخۆی ئێران ڕه‌تکرده‌وه‌، لێدوانێکی ڕه‌خنه‌گرانه‌ی هاوبه‌شی یه‌کیه‌تیی ئه‌ورووپاشی ڕاده‌ستی باڵوێزه‌ ئێرانییه‌که‌ کرد.

هاوکات وته‌بێژی کاروباری ده‌ره‌وه‌ی پارتی گه‌لی سوێد “بیرگیتا ئولس‌سۆن” ئه‌و ده‌ستپێشخه‌رییه‌ی وه‌زاره‌تی ده‌ره‌وه‌ی‌ به‌ ئه‌رێنی زانی، به‌ڵام جه‌ختیکرده‌وه‌ که‌ “ده‌بوو زۆر پێشتر کرابایه”‌. ناوبراو هه‌روه‌ها ئاماژه‌ی به‌وه‌ کرد که‌ وڵاته‌که‌ی پێویسته‌ یارمه‌تیی تایبه‌ت بدات به‌ ئۆپۆزیسیۆنه‌کانی ئێران.

هه‌موو رۆژئاوا نیگه‌رانه‌

زۆربه‌ی وڵاتانی ئه‌ندام له‌ یه‌کیه‌تیی ئه‌ورووپا، له‌ ناویاندا فه‌ڕانسه‌، بریتانیا، ئه‌ڵمانیا و فینلاند باڵوێزه‌کانی ئێرانیان په‌لکێشی وه‌زاره‌تی ده‌ره‌وه‌ کردووه‌ و نیگه‌رانیی خۆیان له‌ بارودخۆی ئێران هێناوه‌ته‌ زمان. هاوکات دوای ئه‌وه‌ی کۆماری ئیسلامیی ئێران چه‌ند دیپلۆماتێکی بریتانی له‌ ئێران وه‌ده‌رنا، دوو دیپلۆماتی ئێرانی له‌ بریتانیا ده‌رکراون.

هه‌روه‌ها ئاژانسی هه‌واڵی ڕۆیته‌رز له‌ سه‌ر زاری وته‌بێژی وه‌زاره‌تی ده‌ره‌وه‌ی ئیتالیا بلاویکرده‌وه‌ که‌ وه‌زاره‌ته‌که‌ی ده‌ستووری به‌ باڵوێزی تارانی خۆی داوه‌‌ تا ده‌رگای باڵوێزخانه‌ به‌ڕووی خۆپیشانده‌رانی برینداردا بکاته‌وه‌. وته‌بێژه‌که‌ ڕاشیگه‌یاندووه‌ که‌ ئه‌م هه‌نگاوه‌ به‌ هاوئاهه‌نگیی له‌گه‌ڵ دیکه‌ی وڵاتانی یه‌کیه‌تی ئه‌ورووپادا ده‌کرێ.

هێندێک سه‌رچاوه‌ه‌ی نافه‌رمییش دوێنێ بڵاویانکرده‌وه‌ که‌ باڵوێزخانه‌ی سوێد له‌ تاران به‌ته‌مایه‌ به‌رنامه‌یه‌ک بۆ په‌نادانی بریندارانی خۆپیشاندانه‌کانی تاران دابنێ. ئه‌م زانیارییه‌ له‌ لایه‌ن هیچ سه‌رچاوه‌یه‌کی ده‌وڵه‌تییه‌وه‌ پشتڕاست نه‌کراوه‌ته‌وه‌ به‌ڵام هیچ سه‌رچاوه‌یه‌کیش ڕه‌تی نه‌کردۆته‌وه‌.

سه‌رۆکی ئه‌مریکا باراک ئۆباما، که‌ تا ئه‌مرۆ به‌ زمانێکی ئارامتر ڕووداوه‌کانی ئه‌م دواییه‌ی تارانی ده‌نرخاند، گومانی نییه‌ له‌وه‌ که‌ له‌ ئاڵۆزییه‌کانی دوای هه‌ڵبژرادنه‌کانی سه‌رکۆماریی ئێراندا مافه‌کانی مرۆڤ پێشێل کراوه‌.

باراک ئۆباما ئه‌مڕۆ له‌ پرێس کۆنفڕانسێکدا گوتی: “کاتێک ژنێک له‌ ترومبێله‌که‌ی داده‌به‌زێ و ده‌درێته‌ به‌ر ده‌ستڕێژ، که‌وابوو کێشه‌یه‌ک هه‌یه‌.”

هه‌ڵوێستی ڕێکخراوه‌کانی مافی مرۆڤ

هه‌ر له‌و بواره‌وه‌ سه‌رۆکی نه‌ته‌وه‌یه‌کگرتووه‌کان بان کی موون ئه‌مرۆ داوای له‌ کۆماری ئیسلامیی ئێران کرد کۆتایی به‌ ڕاپێچکردنی خۆپیشانده‌ر و چالاکانی سیاسی مه‌ده‌نی بێنێت. به‌گوێره‌ی لێدوانێکی فه‌رمیی نه‌ته‌وه‌ یه‌کگرتووه‌کان بان کی مون نیگه‌رانه‌ له‌ پێشێلکرانی مافه‌ بنگه‌هییه‌ سیاسییه‌کانی شارۆمه‌ندانی ئێران.

هه‌ر ئه‌مرۆ ڕێکخراوی لێبوردنی نێونه‌ته‌وه‌یی داوای له‌ کۆماری ئیسلامیی ئێران کرد چیدیکه‌ میلیشیاکانی به‌سیج له‌ دژی خۆپیشانده‌ران به‌کار نه‌هێنێ. ئه‌و داوایه‌ی ئه‌مێنێستی له‌ کاتێکدا دێت که‌ ژماره‌یه‌کی زۆر فیلمی ئه‌شکه‌نجه‌، هه‌روه‌ها ده‌ستڕێژی میلیشیاکانی به‌سیج له‌ هاووڵاتیان له‌ ڕاگه‌یه‌نه‌ گشتییه‌کاندا بلاو بۆته‌وه‌.

به‌گوێره‌ی شاهیدانی ڕووداوه‌که‌، ئه‌و کچه‌ لاوه‌ی که‌ له‌ رۆژانی ڕابردوودا درایه‌ به‌ر ده‌ستڕێژ و وێنه‌که‌ی به‌ سه‌رانسه‌ری جیهاندا بڵاوبۆوه‌، به‌ ده‌ستی میلیشیاکانی به‌سیج کوژراوه‌.

Advertisements

Entry filed under: کۆنه‌بابه‌ت.

هه‌ڵبژاردن؛ ده‌روازه‌یه‌ک بۆ نوێبوونه‌وه‌ کۆمه‌ڵێک چالاکی سیاسی ـ مه‌ده‌نیی کورد نامه‌یه‌ک بۆ شاهروودی ده‌نێرن


ئه‌رشیڤ

حوزه‌یران 2009
د س W پ ه ش ی
« مارس   تەموز »
1234567
891011121314
15161718192021
22232425262728
2930  

سه‌رژمێریی میوان

  • 38,451 میوان سه‌ردانیان کردووم

%d هاوشێوەی ئەم بلۆگەرانە: